Iwwerbléck

• An Däitschland huet Lëtzebuerg e relativ héije Bekanntheetsgrad: 74 % vun de Befrote soen, datt si d’Land kennen (14 % ganz gutt, 67 % mëttelméisseg an 18 % e bëssen).
• 63 % vun deene Leit, déi d’Land kennen, hunn et scho besicht, haaptsächlech aus touristesche Grënn (83 %), soss private Grënn (Besuch vu Frënn oder Familljememberen, 15 %) oder geschäftleche Grënn (13 %).
• 27 % erënnere sech drun, Informatiounen iwwer Lëtzebuerg an de Medie gesinn ze hunn.

Spontan Associatiounen

Déi spontan Associatiounen, déi Däitscher mat Lëtzebuerg maachen, ginn haaptsächlech dominéiert duerch d’Iddi vun:

• engem klenge Land (18 %),
• engem Land mat eenzegaartegen an internationale kulturellen Atouten (16 %),
• an engem Land mat ganz schéine Landschaften (13 %).

Um Niveau vum Image

• Funktionell Dimensioun: Lëtzebuerg gëtt besonnesch gutt bewäert wat seng Attraktivitéit als Aarbechtsplaz an als Standuert fir Investisseuren ugeet. D’Land gëtt allerdéngs manner staark mat enger féierender Roll an der Weltwirtschaft a Verbindung bruecht, besonnesch als Leader an der Fuerschung an de Weltraumtechnologien.
• Normativ / ethesch Dimensioun: D’Land gëtt ganz staark mat Ethik a Wäerter associéiert. Besonnesch gëtt et als tolerant an oppent Land ugesinn, an deem verschidde Kulturen an Nationalitéiten zesummeliewen, souwéi als solidarëscht a verantwortungsbewosst Land, dat eng wichteg Roll beim Erhalt vu Fridden an de Mënscherechter spillt.
• Kulturell Dimensioun: Seng räich Geschicht an d’Gastronomie ginn héich geschat. Am Géigesaz dozou si seng Perséinlechkeeten a sportlech Leeschtunge manner bekannt.
• Naturdimensioun: D’Däitscher hunn eng ganz positiv Perceptioun vu Lëtzebuerg wat d’Natur ugeet. D’Land gëtt virun allem mat schéine Landschaften, enger intakter Natur souwéi mat flotte Séien a Flëss a Verbindung bruecht.
• Emotional Dimensioun: Déi Däitsch bewäerten Lëtzebuerg insgesamt ganz positiv a beschreiwen et als e Land mat oppenen a sympatheschen Awunner, als e ganz agreabelt Land an als eng attraktiv a faszinéierend Destinatioun, besonnesch fir Reesen.

Verhalensfacteuren

• D’Bereetschaft, positiv iwwer Lëtzebuerg ze schwätzen, gëtt virun allem vun der normativer Dimensioun beaflosst, besonnesch duerch Wäerter wéi Solidaritéit, Toleranz, Ëmweltschutz an ethesch verantwortlech Entreprisen.
• D’Decisioun, Produkter aus Lëtzebuerg ze kafen, gëtt vu kulturellen Aspekter beaflosst, virun allem duerch d’Traditiounen, d’Kreativitéit an d’Gastronomie vum Land.
• Déi grouss Majoritéit vun den däitsche Befrote géif gär eng Kéier op Lëtzebuerg reesen, besonnesch wéinst der erhalener Natur an de schéine Landschaften.
• Lëtzebuerg schéngt och attraktiv als Wunn- an Aarbechtsplaz ze sinn, wann och op engem däitlech méi niddregen Niveau. Mat zouhuelender Bekanntheet vum Land klëmmt awer och de Wonsch, zu Lëtzebuerg ze liewen an ze schaffen.

Fazit

• Am Liicht vun de Resultater vun dëser Analys wier et ubruecht, d’Kommunikatiounsstrategie op déi normativ an déi funktionell Dimensioun vun der Reputatioun vu Lëtzebuerg ze fokusséieren, well dës de gréissten Afloss op d’Gesamtreputatioun hunn.
• Et wäert entscheedend sinn, weiderhin d’Ethik an d’Nohaltegkeet, souwéi déi effizient Gouvernance an d’Innovatiounsfäegkeet vum Land ervirzehiewen.

Vergläichend Analys

Zënter der leschter Etüd, déi 2019 an Däitschland duerchgefouert gouf, huet sech d’Bewäertung vu Lëtzebuerg an alle Beräicher verbessert. Besonnesch bemierkenswäert ass d’Hausse vun +0,7 Punkten (+15 %) bei der Gesamtreputatioun (emotional Bewäertung vu Lëtzebuerg) an an der Naturdimensioun.