Iwwerbléck

• An Norwege genéisst Lëtzebuerg e relativ héije Bekanntsheetsgrad: 80 % vun de Befrote ginn un, d’Land ze kennen (10 % ganz gutt, 71 % mëttelméisseg an 19 % e bëssen).
• 42 % vun deenen, déi d’Land kennen, hunn et scho besicht, haaptsächlech aus touristesche Grënn (82 %), dono aus geschäftleche Grënn (12 %) a private Grënn (Besuch vun engem Frënd oder Familljemember, 10 %).
• 26 % erënnere sech drun, an de Medien Informatiounen iwwer Lëtzebuerg gesinn ze hunn.

Spontan Associatiounen

An de spontanen Associatioune vun den Norweger dominéiert d’Iddi vun:

• engem klenge Land (26 %),
• engem Land mat Wuelstand (14 %) an
• engem Land mat eenzegaartegen an internationale kulturellen Atouten (11 %).

Um Niveau vum Image

Um Niveau vum Image sinn d’Bewäertungen insgesamt positiv: d’Perceptioun ass staark un d’Wäerter gebonnen. Normativ Aspekter (Nohaltegkeet, Solidaritéit, eethesch Normen) dominéieren; funktional Aspekter (Innovatioun, Gouvernance) stinn op der zweeter Plaz, wann et drëm geet, e staarken (emotionalen) Image opzebauen.

• Funktional: Déi politesch Stabilitéit an d’Attraktivitéit fir Investisseure ginn unerkannt. Lëtzebuerg gëllt als innovativ, e Land mat enger kompetenter Gouvernance an engem attraktiven internationalen Aarbechtsëmfeld.
• Normativ/eethesch: D’Land gëtt och geschat fir säin Engagement fir nohalteg Entwécklung, seng Solidaritéit a seng eethesch Normen. Lëtzebuerg gëtt als oppen, tolerant a gaaschtfrëndlech Auslänner géintiwwer ugesinn, e Land, dat och eng wichteg Roll am Beräich vum Fridden a vun de Mënscherechter spillt.
• Kulturell: Seng räich Geschicht gëtt valoriséiert, seng Personalitéiten a seng Traditiounen droen dozou bäi, den emotionalen Image ze gestalten, seng Gastronomie a seng sportlech Leeschtunge si wéineg bekannt.
• Natur: Den Image ass ganz positiv a gëtt mat schéine Landschaften, Séien a geschützter Natur associéiert, besonnesch bei Fraen an eelere Leit. D’Dimensioun Natur dréit awer am mannsten zum globalen emotionalen Image bäi.
• Emotional: d’Norweger hu Lëtzebuerg ganz gär, si fannen et faszinant a sympathesch. Dësen emotionalen Image gëtt an éischter Linn duerch normativ Wäerter, dono virun allem duerch funktional Atouten opgebaut.

Verhalensfacteuren

Um Niveau vum Verhale berouen déi positiv Äusserungen iwwer Lëtzebuerg haaptsächlech op den normative Wäerter: D’Solidaritéit an den Engagement fir nohalteg Entwécklung sinn déi zentral Hiewelen, dobäi kommen dann déi kulturell a funktional Dimensiounen, déi d’positiv Äusserunge verstäerken.

• D’Kafabsichte sinn éischter un déi funktional Dimensioune gebonnen, besonnesch un d’Qualitéit an un d’Innovatioun, déi hirersäits vu kulturellen an normativen Elementer ënnerstëtzt ginn.
• De Choix, op Lëtzebuerg ze reesen, baséiert op engem Equiliber: D’Innovatioun an d’Effikassitéit vun der Regierung spillen eng wichteg Roll, dono kommen d’Natur an d’Kultur, genee ewéi d’Geschicht an déi bekannt Personalitéiten.
• D’Unzéiungskraaft fir Talenter schliisslech berout haaptsächlech op normative Wäerter — Nohaltegkeet a Solidaritéit — ergänzt duerch kulturell Elementer ewéi d’Geschicht a Personalitéiten, déi als charismatesch empfonnt ginn, wärend d’Funktionalitéit an d’Natur wéineg Afloss ausüben.

Fazit

Et ass deemno immens wichteg, weiderhin d’Eethik an d’Nohaltegkeet, genee ewéi déi effikass Gouvernance an d’Innovatiounsfäegkeet vum Land an de Fokus ze stellen.