Storytelling
Entdeckt duerch eng Rei Beispiller, wéi den Narrativ vu Lëtzebuerg, Land vun der Kultur a vun de Kulturen, an Ärem Aktivitéitssecteur genotzt ka ginn.
©Thomas Jutzler
Eng Geschicht, fir eng Iddi ze promovéieren, Opmierksamkeet ze erreegen a virun allem duerch Emotiounen ze iwwerzeegen: De „Storytelling“, deen hei duerch eng Rei Beispiller proposéiert gëtt, weist Iech, wéi den Narrativ vu Lëtzebuerg, Land vun der Kultur an de Kulturen, op Ären Aktivitéitsberäich ugepasst ka ginn.
Gesellschaft
Am Ufank vu senger Existenz als onofhängegt Land huet Lëtzebuerg missen op seng eege moer Ressourcen zielen, fir sech ze entwéckelen.
Als Réckgrat vun der deemoleger Lëtzebuerger Ekonomie haten d’Bauere séier verstanen, datt Ausdauer, Upassungsfäegkeet a Wäitsiicht – déi nämmlecht Eegenschaften, déi hinnen zënter Joerhonnerten e Wuesstem erméiglecht haten –, an enger Welt, déi séier ännert, genee esou wichteg an effizient waren.
Si hunn d’Geleeënheete fir ze léieren an ze innovéiere genotzt a si bis un d’Grenze vun deem, dat méiglech war, gaangen. Esou hu si sech selwer an d’Gesellschaft, zu där se gehéiert hunn, kënnen nei erfannen, Schwieregkeeten iwwerwannen an iwwer sech erauswuessen.
D’Approche vum Cultivateur ass nach ëmmer lieweg a charakteristesch fir Lëtzebuerg, si gëtt ënnerstëtzt duerch eng eenzegaarteg Villfalt u Kulturen, déi hei Wuerzele geschloen hunn an d’Land stänneg a Beweegung halen, fir jidderengem e gutt Liewen ze erméiglechen.
©LMIH/Sabino Parente
Ekonomie
Als Ursprong vun eiser Wirtschaftslandschaft hunn déi éischt Lëtzebuerger Baueren, déi mat komplizéierte Wiederbedéngungen an onreegelméissege Recolten ze kämpfen haten, erkannt, wéi wichteg et ass, fir d’Zukunft ze plangen.
Duerch d’Neierfannen an d’Upasse vun hire Praktiken ass et hinnen net nëmme gelongen, hir Aktivitéitsberäicher ze erweideren, mee och eng ganz besonnesch Approche ze entwéckelen, eng Mëschung aus Wäitsiicht, Pragmatismus a Flexibilitéit.
Dës Denkweis, déi d’Epochen, vun der Stol- bis zur Déngschtleeschtungsära iwwerdauert huet, nenne mir „d’Approche vum Cultivateur“.
Haut erfuerdert d’Diversifikatioun vun eiser Ekonomie eng Politik vun der „Multispezialiséierung“ an de Beräicher Industrie, Ëmwelttechnologien, inklusiv Kreeslafwirtschaft an intelligent Mobilitéit, Gesondheetstechnologien, Raumfaarttechnologien, Finanzdéngschtleeschtungen an -technologien, a Logistik, déi sech op Informatiouns- a Kommunikatiounstechnologien als horizontale Motore fir d’Innovatioun stäipen.
Andeems mer innovativ Iddie fir eng besser Welt fërderen, kultivéiere mer d’Zukunft, hei an elo. Mat Iech zesummen.
©LMIH/Sabino Parente
Fuerschung
Als déi dreiwend Kraaft vu Lëtzebuerg an der Vergaangenheet hunn d’Baueren der Lëtzebuerger Gesellschaft den Erfindergeescht an d’Upassungsfäegkeet vermëttelt, déi haut nach hir Aktivitéitsberäicher bestëmmen. Als Vermëttler vu Renconteren am Häerz vun Europa ass d’Land e grousse Laboratoire, wou Studenten, Fuerscher an Entrepreneren an engem Ekosystem vu mënschlecher Dimensioun zesummeschaffen.
Den ëffentleche Fuerschungsbudget, deen zur Verfügung steet, ass deen an Europa, deen am séierste wiisst. Esou kënnen eis Fuerschungsorganisatiounen ultramodern Infrastrukture fir eng Spëtzefuerschung bereetstellen, woubäi d’Zesummenaarbecht mam Privatsecteur an den Administratiounen och u Stäerkt gewënnt.
Fir eis ass d’Fuerschung e staarke Motor, fir zur Visioun 2050 vun enger widderstandsfäeger Welt bäizedroen, an dat duerch geziilt Investitiounen a véier grouss Haaptfuerschungsberäicher: industrielle Wandel an Ëmstrukturéierung vun den Déngschtleeschtungen, nohalteg a verantwortlech Entwécklung, personaliséiert Gesondheet an Educatioun am 21. Joerhonnert.
Méi wéi jee notzt Lëtzebuerg déi onbegrenzt Geleeënheeten, déi d’Innovatioun em bitt. Esou bleift d’Approche vum Cultivateur bestoen an erméiglecht eis, eis stänneg weiderzeentwéckelen.
©LMIH/Sabino Parente
Ëmwelt
D’Geschicht vu Lëtzebuerg ass an der Schéinheet vu senger Natur verwuerzelt. Eis Virfaren aus der Landwirtschaft waren de Capricë vum Wieder ausgesat a konnten net op reegelméisseg Recoltë vertrauen. Si wossten, wéi wichteg Wäitsiicht a Määssegung waren. Si hunn de Buedem wäertgeschätzt.
Andeems si hir Aktivitéiten nei erfonnt a se enger Welt am stännege Wandel ugepasst hunn, goufen aus dëse Baueren Aarbechter, Entrepreneren, Entscheeder. All hu se zum onbeschreifleche Succès vum haitege Lëtzebuerg bäigedroen. Si all loossen d’Approche vum Cultivateur weiderliewen, déi eis houfreg mécht.
Haut si mir dat éischt Land, dat e gratis klimaneutralen ëffentlechen Transport oder weltwäit déi éischt Bourse mat Nohaltegkeetsobligatiounen ageféiert huet. Mir leeschten och deen héchste Pro-Kapp-Bäitrag zur internationaler Klimafinanzéierung an hëllefen esou anere Länner bei hirer Transitioun zu enger méi nohalteger Zukunft.
Vun der Raumplanung iwwer Clean-Tech-Innovatioun bis gréng Finanzéierung wëlle mir duerch e méi intelligente Wuesstem de Wee zu enger Netto-Null-Gesellschaft weisen an eis schrëttweis a Richtung „One Planet Footprint“ beweegen, d. h. den ökologesche Foussofdrock op eng Äerd beschränken.
Och wa mer nach net do ukomm sinn, ass dat d’Zil, dat eis als Land, dat säi Buedem wäertschätzt, undreift. Well mir dat, wat mir gär hunn, schützen.
©Visit Eislek