Tipps fir Är Kommunikatioun

Kréativitéit

• Denkt drun: léiwer Äre Publikum direkt erreechen, wéi em Informatiounen ze erklären. D'Emotioun, d'Identifikatioun, d'Zougehéieregkeetsgefill sinn déi bescht Moyenen, fir Äre Message dauerhaft ze iwwermëttelen.
• Dot Iech mat Handwierker zesummen a valoriséiert se an Ärer Kommunikatioun: Si sinn de liewege Beweis vun der Kreativitéit vu Lëtzebuerg.
• Weist Iech esou innovativ wéi d'Virdeeler vu Lëtzebuerg, iwwer déi Dir kommunizéiert: Déi nei Technologien, wéi d'QR-Coden, d'Near Filed Communication oder d'Augmented Reality iwwermëttelen implizitt Är Expertis als digital nation.

Diversitéit

• Frot Iech, ob Är Messagen net nëmme verständlech, mee och méiglechst ville Leit zougänglech sinn.
• Berécksiichtegt och d'Accessibilitéitsreegelen, a gitt iwwer dës Reegelen eraus. Dat eleng ass schonn e Message vun der Oppenheet fir sech.
• Denkt drun, Iech un en Atelier protégé fir d'Drécken an d'Verpake vun Ärem Kommunikatiounssuppport ze wenden. Dëst huet e positiven Impakt op gesellschaftlechem Niveau an och a punkto Perceptioun vun Ärem Message.
• Erméiglecht Ärem Publikum mat Iech ze interagéieren: organiséiert Participatiounscampagnen (z. B. iwwer Projetsopriff oder evenementiellen Aspekter, déi den Austausch fërderen) a profitéiert vun den interaktiven Dimensiounen, déi d'digital Tools bidde kënnen.

Nohaltegkeet

• Anescht wéi ee villäicht mengt, huet och eng digital Léisung en Impakt op d'Ëmwelt. Wousst Dir, datt zum Beispill den Impakt vun engem kuerze Video op de soziale Medien dräimol méi héich ass, wéi dee vun engem Flyer op Pabeier?*
• Analyséiert de Liewenszyklus vun Ärem Projet: vum Rostoff iwwer d'Transformatioun, d'Fabrikatioun, d'Distributioun an duerno d'Ëmsetzung an d'Verwendung, bis bei d'Valorisatioun oder d'Entsuergung**.
• Denkt och un de Choix vum Pabeier: recycléiert, mat geréngem Flächegewiicht, FSC-zertifiéiert, ouni Chlore blanchéiert ... Un d'Ëmwelt ab der Gestaltung vun der Maquette denken (Choix vun den Typographien, de Faarwen, dem Dréckraster, de Finitiounen...) ka considerabel d'Consommatioun vun den Tënte reduzéieren.
• Vergiesst net, d'Enn vum Liewenszyklus vun engem gedréckte Support ze anticipéieren: Wann de Support triéiert an da recycléiert gëtt, kann e valoriséiert ginn a firwat net, nach eng Kéier am Kader vun Ärer Kommunikatioun ugewannt ginn.
• Vergiesst och net iwwer Är Efforten ze kommunizéieren. Den FSC-Label, de Logo vun engem Atelier protégé, d'Zesummenaarbecht mat engem Handwierker fir eng Produktioun 100% made in Luxembourg sträichen Är Wäerter an Är Prioritéiten ervir, an esou och déi vu Lëtzebuerg.

Kréativitéit

• Aus Gewunnecht, Bequeemlechkeet oder Traditioun, associéiere mir dacks e bestëmmten Typ vun Evenement mat enger bestëmmter virgefaasster Form oder Struktur, déi jidderengem bekannt ass. Et ass awer esou, datt een duerch d'Ännere vun der Terminologie, der Plaz oder der Associatioun e ganz neie Bléck fir d'Evenement kéieren, méi Visiteuren unzéien an d'Invitéë méi laang dohale kann.
• Dir wëllt Är Expertis als digital nation vermëttelen? Weist Iech esou innovativ wéi d'Virdeeler vu Lëtzebuerg, iwwer déi Dir kommunizéiert: Amplaz Är Argumenter ze presentéieren, setzt op déi nei Technologien a loosst se mat immersiven Experienze lieweg ginn.ts, faites les vivre par des expériences immersives.

Diversitéit

• Ass Äert Evenement méiglechst ville Mënschen zougänglech? D'Accessibilitéitsreegele berécksiichtegen, an iwwer dës Reegelen erausgoen, ass eleng schonn e Message vun der Oppenheet fir sech.
• Denkt drun, Iech un en Atelier protégé fir d'Preparatioun, d'Verpaken an de Catering-Service ze wenden. Dëst huet e positiven Impakt op gesellschaftlechem Niveau an och a punkto Perceptioun vun Ärem Evenement.
• Erméiglecht Ärem Publikum mat Iech ze interagéieren: organiséiert participativ Evenementer (z. B. andeems Dir Är Invitéen invitéiert un der Preparatioun oder um Deroulement vun der Soirée deelzehuelen) a profitéiert vun den interaktiven Dimensiounen, déi d'digital Tools bidde kënnen.

Nohaltegkeet

• Ëmweltfrëndlech Plazen a Material, Accessibilitéit duerch den ëffentlechen Transport, d'Zesummestellung vum Menü, d'Hierkonft vun de Liewensmëttel a manner Verschwendung sinn all Aspekter, déi bei der Gestaltung an an der Kommunikatioun vun Ären Evenementer berécksiichtegt musse ginn.
• Kennt Dir "Green Events"? Fir d'Organisateuren ze ënnerstëtzen, déi sech nohalteg engagéieren, vergëtt de Ministère fir Ëmwelt, Klima an nohalteg Entwécklung ökoresponsabel Logoen, an dat a follgende Kategorien: Kommunikatioun & Marketing, Dekoratioun & Material, Mobilitéit, Iessen & Gedrénks, Offall, Waasser & Sanitär, Energie, ekologescht Engagement. Mée Info op : greenevents.lu.
• Vergiesst och net iwwer Är Efforten ze kommunizéieren. Äert Engagement fir eng méi nohalteg Welt ass e Message, dee vill iwwer d'Wäerter an d'Prioritéite vu Lëtzebuerg ausseet.

Kréativitéit

• Wéi fir eist Zil "d'Wäerter an d’Gesiichter vu Lëtzebuerg bekannt maachen", gräife mir op Produzenten, Handwierker a Kënschtler aus Lëtzebuerg zeréck, fir de Lëtzebuerger Know-How an der Welt bekannt ze maachen.
• Mir encouragéiere si, eis Artikelen, Formater a Konzepter, déi d'Land illustréieren an erzielen, ze proposéieren. D'Promotioun vum Markenimage vu Lëtzebuerg war vun Ufank un eng participativ Initiativ - och elo nach ëmmer an der Elaboratioun vu sengen ausgewielten Artikelen a Produkter.
• Iwwer e Storytelling versiche mir d'Kreativitéit vum Land ze valoriséieren, andeems mir d'Produzenten an d'Handwierker hannert de Produite virstellen. Iwwer Texter a Fotoen, déi d'Fraen an d'Männer portraitéieren, déi d'Artikele vun der LuXembourg Collection erduecht, kreéiert a fabrizéiert hunn, sträiche mir d'Wäerter an och d'Gesiichter vum Land ervir.
• Iwwert e QR-Code (oder en NFC-Chip) um Artikel, wëlle mir, datt all Keefer op eng Geschicht oder e Message, déi oder deen den Artikel kontextualiséiert, zougräife kann.

Diversitéit

• Déi inklusiv Dimensioun ass essenziell an der Entwécklung vun der LuXembourg Collection. Esou wäit wéi méiglech, versiche mir op Betriber aus der Solidarwirtschaft zeréckzegräifen (Atelier-protégéen, Fondatiounen, Betriber mat gesellschaftlechem Impakt) fir d'Gestaltung, d'Realisatioun oder d'Verpake vun eisen Artikelen.
• Duerch Participatiouns- oder Projetsopriff, ass eis Ambitioun, dat kreatiivt Potenzial vun all Eenzelen ze entwéckelen a méiglechst vill Acteuren ze erreechen, sief et Produzenten vu "made in Luxembourg"-Produiten oder Artikelen, déi de Lien tëscht Lëtzebuerg an engem Partnerland erzielen (iwwer d'Ekonomie, d'Zesummenaarbecht oder d'Kultur).
• Mir sinn houfreg, iwwer eis inklusiv Approche ze kommunizéieren. Net nëmme well se e positiven Impakt op gesellschaftlechem Niveau huet, mee och well se d'Kohärenz vun de Messagen, déi mir vermëttelen, garantéiert.

Nohaltegkeet

• D'LuXembourg Collection leet den Akzent virun allem op d'lokal Produktioun, fir esou den ökologeschen Foussofdrock ze reduzéieren a zur Promotioun vum lokalen Know-How bäizedroen.
• Mir favoriséieren ökolabelliséiert Produiten, nohalteg Méifachverwendungsproduiten, déi energieeffizient oder opluedbar sinn, biodegradabel oder recyclabel um Enn vum Liewenszyklus sinn an och recycléiert Material.
• Mir beméien eis iwwerfällegen Offall (virun allem wat d'Verpackunge betrëfft) ze evitéieren an eng minimal Verpackung ze promovéieren.
• Mir beméien eis den Inventaire vun de Ressourcen, de Matièren an de Produzenten zu Lëtzebuerg ze maachen a sinn ëmmer drop aus, nei Produiten ze fannen, déi eisen Nohaltegkeetskrittären entspriechen.